Lankide berriak ezagutu, elkarlanerako kideak aurkitu 

eTwinning profesionalek osatutako elkartea da 32 herri europarretako irakasleak biltzen dituena. Leku ezin hobea da beste lankide batzuk ezagutzeko, ideiak elkartrukatu, eztabaidatu eta berekin proiektuak garatzeko. Non eta nola aurkitu lankide horiek?

Topaguneak: eTwinning Taldeak, Topaketa Didaktikoak, Irakasleen Bloga.

Tresna hauek topaguneak eskaintzen dizkiete irakasleei interes komuneko gairen baten inguruan biltzeko. Topagune horietan aurkituko dituzu era bateko eta besteko jarduerak gai horien inguruan (foroak, fitxategiak, txatak, ikaskuntza-jarduerak...). Beste alde batetik, berriz, irakasle batek gure kezka profesional bera duela atzematea eta hasieratik kezka horren inguruan lan egitea modu ezin hobea da elkarlanerako kide bat topatu eta proiektu bati ekiteko.

Ideia artean arakatzen: galeriak, iritziekin konektatu. 

Irakasleen profilaz gain ikusi eta araka ditzakezu gauza gehiago ere eTwinning-en. Eskura izango dituzu, era berean, jardunbide onen, proiektu proposamen eta ideia etsenplu ugari, eta abar.  Kasu askotan, erabiltzaileek balora ditzakete, eta hala, beren iritziak komunitateko gainerako kideekin konpartitu. Besterik gabe, araka ezazu erakargarri zaizun proiektu bat, eta, orduan kontaktatu ahal izango duzu proiektu horretan parte hartutako irakasleekin. Edo topa ezazu interesgarri zaizun ideia bat eta begiratu nor datorren bat zurekin iritzian. Zure komentario eta balorazioak ere azaldu bertan; hartara, beste erabiltzaile batzuek ere "jarraitu ahal izango dute zure arrastoa". Abiapuntu ona da norbaitekin kontaktatzeko eta proiektu bati ekiteko aukera aztertzeko.   

Kide bila: bilatzaileak, foroa.  

Elkarlanerako kide posible baten bila bazabiltza, izan ezazu gogoan ez dutela eTwinning-eko irakasle guztiek hartzen parte taldeetan, ez direla guztiak agertzen galerietan ez eta daitezkeela beren iritzien bidez topatu. Izan daiteke, halaber, zuk zer-nolako proiektua egin nahi duzun oso ideia zehatza izatea: zein herritako edo zein hiritakoa  nahi duzun kidea, zein adinetakoa eta zein ikasgaitakoa... Edo agian, ezagutzen duzun (era birtualean edo pertsona bera) norbaiten profilera joan nahi duzu eta zure kontaktuetan gehitu.

Aholku batzuk: ez da beti lehen kolpean asmatzen. 

Beste edozein elkartetan bezala, badira jokabide arau batzuk eta komeni da jarraitzea. Beste alde batetik, berriz, zuk kontaktatzen dituzun irakasle guztiek ez dute zertan izan zure proiekturako kide "ezin egokiagoak". Izan ere, gerta daiteke beren lana gogoko duzun irakasle batzuk ezagutzea, edo haien iritziekin bat etortzea eta haiekin material batzuk trukatzea, baina, halarik ere, ez izatea aukera ona proiektu bat hasteko: beharbada, zuen ikasleen adina, ikasgaiak edo gauzatu nahi duzuen proiektua ez dira bata bestearekin uztartzeko modukoak. Izan ezazu pazientzia eta ez behar baino arinago erabaki gauzak: lehenago edo geroago topatuko duzu zurekin elkarlanean aritzeko modukoren bat. Hemen jarraian aholku batzuk dituzu lankideekin harremanetan sartzeko eta elkarlanerako kide bat topatzeko.

• Ez inor gehitu aldez aurreko komunikaziorik gabe: Elkarlanean lankide nahi zenukeenen bat topatu baldin baduzu, ez iezaiozu hasiera-hasieratik beste gabe zure kontaktuen artekoa izateko proposamena egin. Hori egin baino lehen, ahalegindu zaitez nolabaiteko komunikazioren bat sortzen eta egiazta ezazu beste irakasle hori ere interesatuta dagoela. Komunikazio hori egin dezakezu Taldeetan edo Didaktika Topaketetan, foroko sarrera bati erantzunez, edo posta elektroniko bat bidaliz.  

• Izan gogoan herrien arteko kultur desberdintasunak: Izan ezazu kontua partaide guztien arteko desberdintasun kulturalekin. Testu bera jo dezakete formalegitzat edo informalegitzat herri batzuetan eta besteetan, eta gerta daiteke hitz batek, esaterako, "laster" hitzak bere itzulpen literalaz gain esanahi aukera zabala ere izatea. Adieraz itzazu gauzak argiro idaztean eta izan zaitez atsegina neurrian, eta, ulertzen ez duzun edo gogoko ez duzun zerbait irakurtzen duzunean, eska iezaiozu dagokionari azaltzeko beste gabe epaitu baino lehen (eta prest egon besteak zuri beste horrenbeste eska diezazuten ere onartzeko).

• Bete itzazu hartutako konpromisoak: Dokumentuak bidaltzeko edo mezuei erantzuteko epe jakin batzuk erabakitzen badituzue, ahalegindu zaitez betetzen. Ezinezkoa bazaizu, idatz iezaiozu besterik ez bada mezu bat zure kontaktuari ezintasun horren berri emanez. Eta erabakitzen baldin baduzu ez duzula irakasle horrekin lan egin nahi, adieraz iezaiozu argi eta garbi. Zure hurrengo mezua noiz jasoko zain uztea baino hobe da hori.  

• Nabiga ezazu eskura duzun informazio guztian zehar: Gogoko duzun ideia bat irakurtzean, araka itzazu irakasle hori sartuta ibili den proiektu guztiak; begira ezazu zenbat proiektutan, nola egiten duen lan... Horrek guztiak emango dizu ideia hori gauzatzeko eraren ikuspegi zehatza.

• Azter ezazu zertan zatozten bat eta egiaztatu: Elkarlanerako kidea izan litekeen bat topatu duzu eta biok nahi duzue elkarrekin lan egin. Proiektuari "serio" ekin aurretik, hainbat gauza izan behar dituzu kontuan eta aintzat hartu. Ez dago kuestio horiei beti eta beti era berean erantzun beharrik, baina, batzuek eta besteek ere bateragarriak izan behar dute erantzun horiek, eta kideek elkarlanean jardun ahal izatea ahalbidetu. Ondoren jarraian, horietako galdera batzuk iradokitzen zaizkizu.  
  • Zein gaitan egin nahi dugu lan elkarrekin? 
  • Zein helburu iritsi nahi ditut eTwinning-eko nire proiektuaren bidez? Zer helburu komun ditugu hark eta nik?
  • Antzeko ikuspuntu pedagogikoa dugu? 
  • Zein hizkuntzatan komunika gaitezke? Eta gure ikasleak? 
  • Badakit nolakoa den nire lankidearen eskola-sistema? Bat datoz ikastetxe mota eta ikastaro mota?
  • Proiektua urtebete baino gehiago luzatzekoa baldin bada, ikasle talde bat eta berarentzat egingo dugu plana ala talde bat baino gehiagorentzat? 
  • Zer emaitza lortu nahi dugu azken buruan?
  • Zer opor ditugu batak eta besteak? Egin dezakegu elkarrekin lan, posible da?
  • Astean / urtean zer denbora eman nahi dugu proiektuan? 
  • Zer IKT tresna erabili nahi ditugu ikasleen arteko elkarlanean?
  • Nola bideratu eta gauzatuko dugu proiektua ikasgelan? Eta nola parte harraraziko diegu ikasleei?
  • Nola jar gaitezke harremanean erraz eta arin?
  • Zein komunikazio bide baliatu nahi ditugu (posta elektronikoa, telefonoa, txata...)?

Pres zaude? Jende interesgarria ezagutu duzu, eta, elkarlanerako kide izan litekeenen bat ere bai horien artean? Ados zaudete elkarrekin lanean jarduteko, eta ikusi duzu jardun dezakezuela? Hortaz, orain duzu unea zuen proiektuan lanean hasteko. Zorte ona izan eta  lan ona egin!